லக்னௌ சூப்பர் ஜெயன்ட்ஸுக்கு எதிரான ஆட்டத்தில் வெற்றி பெற்ற நம்பிக்கையுடன் குஜராத் டைட்டன்ஸ் களமிறங்கியது. டாஸ் வென்ற மும்பை இந்தியன்ஸ் கேப்டன் ரோஹித் சர்மா முதலில் பந்துவீச்சைத் தேர்வு செய்தார். மும்பையில் ஆர்ச்சருக்குப் பதிலாக ரைலி மெரிடித்தும், ஷோகீனுக்குப் பதில் குமார் கார்த்திகேயாவும் சேர்க்கப்பட்டார்கள். குஜராத்தில் ஜோஷ் லிட்டில் களமிறங்கினார்.

4 ரன்களில் சஹா விக்கெட்டை அர்ஜுன் டெண்டுல்கர் வீழ்த்த, பவர்பிளேயின் கடைசி ஓவரில் ஷுப்மன் கில் அதிரடியாக விளையாடினார். பவர்பிளேயில் குஜராத்துக்கு 50 ரன்கள் கிடைத்தன. பவர்பிளே முடிந்தவுடன் பந்தைச் சுழற்ற வந்த பியூஷ் சாவ்லா முதல் பந்திலேயே ஹார்திக் பாண்டியாவை வீழ்த்தினார்.

10 ஓவர்கள் முடிவில் குஜராத் 2 விக்கெட் இழப்புக்கு 84 ரன்கள் எடுத்தது. கில் 30 பந்துகளில் அரை சதத்தை எட்டினார். 56 ரன்களில் ஆட்டமிழந்தார். அடுத்த ஓவரில் விஜய் சங்கரும் அவுட். அடுத்தடுத்து விக்கெட்டுகள் விழுந்ததால், ரன் குவிப்பில் குஜராத் திணறுமா எனக் கேள்வி எழுந்தது. ஆனால் மில்லரும், மனோஹரும் பவுண்டரிகள் மூலம் பதில் தாக்குதல் நடத்தினார்கள். 16 ஓவர்களில் 137 ரன்கள் எடுத்து கடைசி ஓவர்களுக்கான அதிரடிக்குத் தயாரானது குஜராத்.

முந்தைய ஆட்டத்தில் மும்பைக்கு எதிராக பஞ்சாப் என்ன செய்ததோ அதையே தான் குஜராத்தும் இன்று செய்தது. கடைசி 4 ஓவர்களில் பவுண்டரிகளும் சிக்ஸர்களும் பறந்தன. மெரிடித் வீசிய 17-வது ஓவரில் 13 ரன்கள். கேமரூன் கிரீன் வீசிய 18-வது ஓவரில் மனோஹர் 2 சிக்ஸர்களையும், மில்லர் ஒரு சிக்ஸரையும் பறக்கவிட, அந்த ஓவரில் 22 ரன்கள் கிடைத்தன. 19-வது ஓவரின் முதல் பந்திலேயே மனோஹரை ஆட்டமிழக்கச் செய்தார் மெரிடித். இருந்தும் பயனில்லை. அடுத்து வந்த தெவாதியா மேலும் மிரட்டினார். முதல் பந்திலேயே சிக்ஸர் அடித்தார். அதே ஓவரில் மில்லர் 2 சிக்ஸர்கள் அடிக்க, அந்த ஓவரில் 19 ரன்கள் கிடைத்தன.

கடைசி ஓவரில் தெவாதியா 2 சிக்ஸர்களைப் பறக்க விட்டார். கடைசி ஓவரில் 16 ரன்கள். குஜராத் 6 விக்கெட்டுகள் இழப்புக்கு 207 ரன்கள் எடுத்தது. மில்லர் 22 பந்துகளில் 46 ரன்களும் தெவாதியா ஆட்டமிழக்காமல் 5 பந்துகளில் 20 ரன்கள் எடுத்தார்கள். கடைசி 4 ஓவர்களில் 70 ரன்கள்! இந்த ஐபிஎல்-லில் வேறு எந்த அணியும் கடைசி 4 ஓவர்களில் இத்தனை ரன்களை எடுக்கவில்லை.

மும்பைக்கு எதிர்பார்த்த தொடக்கம் அமையவில்லை. ரோஹித் சர்மா வெறும் 2 ரன்களுக்கு ஹார்திக் பந்தில் ஆட்டமிழந்தார். இஷான் கிஷன் திணறல் ஆட்டத்தை வெளிப்படுத்த, பவர் பிளேயில் ரன்கள் உயரவே இல்லை. 6 ஓவர்களில் 1 விக்கெட் இழப்புக்கு 29 ரன்கள் மட்டுமே மும்பை எடுத்தது. இதற்குப் பிறகு மும்பையால் குஜராத்தை விரட்ட முடியவே இல்லை.

6-வது ஓவரிலிருந்து ரஷித் கான் மற்றும் நூர் அஹமதுவை வைத்தே மும்பையைக் கட்டுப்படுத்தினார் பாண்டியா. முதலில் 21 பந்துகளில் 13 ரன்கள் எடுத்த இஷான் கிஷன் ஆட்டமிழந்தார். அதே ஓவரில் திலக் வர்மாவையும் (0) எல்பிடபிள்யு செய்தார் ரஷித் கான். இதே பாணியைத்தான் நூர் அகமதுவும் பின்பற்றினார். தனிநபராகப் போராடி வந்த கேம்ரூன் க்ரீனை 33 ரன்களில் முதலில் வீழ்த்தினார். இதே ஓவரில் அடுத்து வந்த டிம் டேவிட்டை டக் அவுட்டாக்கினார்.

11 ஓவர்களில் 5 விக்கெட் இழப்புக்கு 59 ரன்கள் மட்டுமே எடுத்து பரிதாபத்துக்குரிய நிலையில் மும்பை இருந்தது. சூர்யகுமார் யாதவ் ஓரளவு அதிரடியாக விளையாடினார். ஆனால் 12 பந்துகளில் 23 ரன்கள் எடுத்து நூர் அஹமது பந்தில் ஆட்டமிழந்தார்.

ஆட்டம் முடிந்தது என அனைவரும் நினைத்தபோது, 22 வயது வதேரா - பியூஷ் சாவ்லா ஜோடி சிறிது அதிரடியாக விளையாடியது. இந்த ஜோடி 7-வது விக்கெட்டுக்கு 25 பந்துகளில் 45 ரன்கள் சேர்த்தது. சாவ்லா 18 ரன்களுக்கும், வதேரா 21 பந்துகளில் 3 சிக்ஸர்களுடன் 40 ரன்களுக்கும் ஆட்டமிழந்தார்கள். விக்கெட்டுகள் விழுந்ததால், அர்ஜுன் டெண்டுல்கருக்கு பேட்டிங் செய்ய வாய்ப்பு கிடைக்க, அவரும் தனது முதல் சிக்ஸரை அடித்தார்.

20 ஓவர்கள் முடிவில் மும்பை 9 விக்கெட்டுகள் இழப்புக்கு 152 ரன்கள் மட்டுமே எடுத்தது. குஜராத் 55 ரன்கள் வித்தியாசத்தில் அபார வெற்றி பெற்றது. புள்ளிகள் பட்டியலில் குஜராத் 2-வது இடத்துக்கு முன்னேற, மும்பை 7-வது இடத்தில் உள்ளது.

À®®à¯à®®à¯à®ªà¯à®¯à¯ à®µà¯à®´à¯à®¤à¯à®¤à®¿ 2-à®®à¯ à®à®à®¤à¯à®¤à¯à®à¯à®à¯ à®®à¯à®©à¯à®©à¯à®±à®¿à®¯ à®à¯à®à®°à®¾à®¤à¯!

2023-04-25 18:36:29

À®®à¯à®®à¯à®ªà¯à®¯à¯ à®µà¯à®´à¯à®¤à¯à®¤à®¿ 2-à®®à¯ à®à®à®¤à¯à®¤à¯à®à¯à®à¯ à®®à¯à®©à¯à®©à¯à®±à®¿à®¯ à®à¯à®à®°à®¾à®¤à¯!